Our Lady Of Medjugorje

Messages From 2007 In Papiamento

Mensahe di dia 25 di yanüari 2007 "Mi yunan stimá! Boso Beibel mester tin un lugá di honor den boso kas i les´É. Asina boso ta siña resa fo´i kurason i boso pensamentu lo ta riba Dios. No lubidá ku e bida akí ta pasahero manera un flor di kunuku, ku nos por mira fo´i djaleu, pero ku ta disparsé un djis. Mi yunan stimá, unda ku boso ta, laga un señal di bondat i stimashon, i Dios lo bendishoná boso rikamente. Danki pa korespondé na mi yamada." 01/2007

Mensahe di 25 di febrüari 2007 "Mi yunan stimá, habri boso kurason na mizerikòrdia di Dios den e tempu di Kuaresma akí. Dios, nos Tata selestial, ta deseá pa libra kada un di boso fo’i sklabitut di piká. P’esei, mi yunan stimá, provechá e tempu akí i pa medio di boso enkuentro ku Dios den Sakramentu di Konfeshon, bandoná piká i disidí pa santidat. Hasi esaki pa amor na Hesus, Kende a redimí (salba) boso tur ku su Sanger, i asina boso por biba felis i na pas. No lubidá, mi yunan stimá, ku boso libertat ta boso debilidat, p’esei, tuma na serio mi mensahenan. Danki pa korespondé na mi yamada." 02/2007

Mensahe di 25 di mart 2007 "Mi yunan stimá. Mi ke yama boso tur danki fo’i kurason pa boso sakrifisonan ku boso a hasi durante e tempu di Kuaresma. Mi ta deseá di inspirá boso pa sigui biba e ayuno ku un kurason sinsero. Ku ayuno i sakrifisio, mi yunan stimá, boso lo ta mas fuerte den boso fe. Den Dios boso lo haña e pas bèrdadero, pa medio di boso orashon di tur dia. Mi ta ku boso i Mi no ta kansá. Mi ta deseá di hiba boso tur na shelu huntu ku Mi, p’esei boso mester disidí tur dia pa santidat. Danki pa korespondé na mi yamada". 03/2007

Mensahe di 25 di aprel 2007 "Mi yunan stimá. Awe tambe mi ta bolbe yama boso pa kombertí. Habri boso kurason. Esaki ta e tempu di grasia. Miéntras Mi ta ku boso, hasi bon uzo di dje. Bisa: “Esaki ta e tempu pa mi alma.” Mi ta ku boso i Mi stima boso ku un amor infinito. Danki pa korespondé na mi yamada." 04/2007

Mensahe di 25 de mei 2007 "Mi yunan stimá. Resa huntu ku Mi na Spiritu Santu, riba kaminda di boso santidat, E guia boso pa boso hañá sa boluntat di Dios. I boso, ku ta biba leu fo’i orashon, kombertí i buska den e silensio di boso kurason, salbashon di boso alma i aliment’é ku boso orashon. Mi ta bendishoná boso tur, un pa un, ku mi bendishon di Mama. Danki pa korespondé na mi yamada. 05/2007

Mensahe di 25 di yüni 2007 "Mi yunan stimá. Awe tambe, ku mi kurason yen di legria, Mi ta invitá boso pa boso kombertí. Mi yunan stimá, no lubidá ku boso tur ta masha importante pa e plan akí ku Dios ta manda pa boso pa medio di Medjugorje. Dios ta deseá di hasi henter mundu kombertí henter humanidat, i E ta yama tur hende pa salba nan i pa henter mundu riba e kaminda ku ta kondusí na djE, Kende ta kuminsamentu i fin di tur kos. Na un manera spesial, mi yunan stimá, Mi ta invitá boso fo’i profundo di mi Kurason: habri boso mes pa e grasia grandi ku Dios ta duna boso pa medio di mi presensia. Mi ke gradisí kada un di boso pa boso sakrifisio- i orashonnan. Mi ta ku boso i Mi ta bendishoná boso. Danki pa korespondé na mi yamada." 06/2007

Mensahe di 25 di yüli 2007 "Mi yunan stimá! Awe riba dia di Patrono di boso parokia (nt: San Hakobo, Apòstel), mi ta invitá boso pa imitá bida di santunan. Mara nan por ta un ehèmpel i enkurashamentu pa un bida di santidat. Mara orashon por ta pa boso manera e airu ku boso ta respirá, i no un peso pisá. Mi yunan stimá, Dios lo revelá na boso su amor, i lo boso eksperensiá e legria ku boso ta mi yunan stimá. Dios lo bendishoná boso i lo duna boso su grasia na abundancia. Danki pa korespondé na mi yamada" 07/2007

Mensahe di 25 di sèptèmber, 2007 "Mi yunan stimá! Awe tambe Mi ta invitá boso tur pa boso kurason ta kima di amor bibu pa Hesus Krusifiká. I no lubidá ku El a entregá su bida pa boso pasobra E tabata yen di amor pa boso, pa asina boso por ta salbá. Mi yunan stimá, meditá i resa pa boso kurason por habri pa amor di Dios. Danki pa correspondé na mi yamada." 09/2007

Mensahe di 25 di òktober, 2007 "Mi yunan stimá! Pa su amor pa boso, Dios a manda Mi meimei di boso, pa guia boso riba e kaminda di salbashon. Hopi di boso a habri boso kurason i a aseptá mi mensahenan, pero hopi tambe a pèrdè e kaminda i nunka nan no a konosé e Dios di amor, ku henter nan kurason. P'esei mi ta invitá boso, pa boso ta amor i lus, kaminda tin skuridat i piká. Mi ta ku boso i Mi ta bendishoná boso tur. Danki pa korespondé na mi yamada." 10/2007

Mensahe di 25 di Novèmber, 2007 "Mi yuna stimá! Awe ku boso ta selebrá Fiesta di Kristu, Rei di Universo, mi ta deseá ku E sea Rei di boso bida. Solamente si boso, mi yunan stimá, entregá boso na djE kompletamente, boso por komprondé e don di su sakrifisio riba krus pa kada un di boso. Mi yunan stimá, dediká tempu na Dios, pa Dios transformá boso i yena boso ku su grasia, di e manera akí boso bira grasia pa otronan. Ami mes, mi yunan stimá, ta un don di grasia di amor, ku ta bini di Dios pa e mundu akí ku no tin pas. Danki pa korespondé na mi yamada!" 11/2007

Mensahe di 25 di dezèmber 2007 "Mi yunan stimá! Ku gran legria Mi ta trese pa boso e Rei di Pas pa E bendishoná boso. Ador’É i dediká tempu na Kreadó, Kende boso kurason ta anhelá. No lubidá ku boso ta peregriná pa poko tempu riba mundu i ku tur kos di mundu por duna boso solamente un poko legria, ma pa medio di mi Yu, boso ta risibí e regalu di bida etèrno. P’esei Ami ta ku boso, pa guia boso na loke boso kurason ta anhelá. Danki pa korespondé na mi yamada." 12/2007


BackHomeOverviewInfo
Last Modified 12/26/2007