Our Lady Of Medjugorje

Messages From 2003 In Papiamento

Mensahe riba 25 di yanüari 2003 "Mi yunan stimá! Pa medio di e mensahe aki, Mi ta invitá boso pa resa pa pas. Resa pa pas i duna testimonio di pas, spesialmente e dianan aki ku pas ta pasando den momentunan difísil. Mi yunan stimá, boso sea personifikashon di pas, den un mundu ku no tin pas. Danki pa aseptá mi yamada!" 1/2003

Mensahe riba dia 25 di febrüari 2003 "Mi yunan stimá! Awe tambe Mi ta invitá boso pa resa i yuna pa mundu por haña pas. Mi yunan stimá! M´a bisa boso esaki hopi biaha kaba. Awe, un biaha mas Mi ta bisa boso: ku orashon i ayuno so nos por evitá tur guera. Pas ta un don presioso di Dios. Buska, pidi i boso lo haña. Papia tokante di pas i biba e pas den boso kurason. Boso mester kuida pas manera un flor bibu i bunita, un flor ku tin mester di awa, amor i lus. Boso mester ta hende ku ta hiba pas tur kaminda. Ami ta ku boso i Mi ta resa huntu ku boso.Danki pa aseptá mi yamada!" 02/2003

Mensahe riba dia 25 di mart 2003 "Mi yunan stimá! Awe tambe Mi ta invitá boso pa boso sigui resa pa pas. Mi yunan stimá, mara boso por resa ku boso kurason i mara por boso no pèrdè boso speransa, pasobra Dios ta stima boso, su kriaturanan. E ke salba boso, kada ún di boso, pa medio di mi presensia meimei di boso. Mi ta invitá boso pa kana e kaminda di santidat. Resa i,den orashon,boso ta habrí pa boluntat di Dios, di e manera akí, i den tur loke boso hasi, boso ta realisá e proyekto di Dios den boso i pa medio di boso. Danki pa aseptá mi yamada!" 03/2003

Mensahe di dia 25 di aprel 2003 "Mi yunan stimá! Mi ta pidi boso, pa habri boso pa orashon. Durante e dianan di Kuaresma, ku ta tras di lomba, boso por a realisá kon frágil boso ta i ki poko fe boso tin. Mi yunan stimá! Awe tambe mi ta pidi boso pa skohe pa Dios, pa E por kambia boso kurason i, pa medio di boso, E por kambia kurason di hende. Boso mester ta mensaheronan alegre di Kristu Resusitá den un mundu ku ta karesé di pas, ku ta anhelá Dios i pa tur loke ta di Dios. Ami ta ku boso, mi yunan stimá, i Mi ta stima boso ku amor spesial. Danki pa korespondé na mi yamada!" 04/2003

Mensahe di dia 25 di mei 2003 "Mi yunan stimá! Awe tambe Mi ta invitá boso pa resa for di boso kurason. Pidi Spiritu Santu pa E yuda boso resa for di kurason, asina boso lo renobá boso orashon personal. Mi ta resa pa boso tur, mi yunan stimá. Mi ta invitá boso pa hasi un kombershon radikal i kambia boso kurason. Si boso kombertí, tur esnan ku ta rònt di boso tambe lo renobá nan mes i orashon lo ta un legria grandi pa nan tur. Danki pa korespondé na mi yamada!" 05/2003

Mensahe di dia 25 di juni 2003 "Mi yunan stimá! Ku hopi legria Mi ke invitá boso biba e mensahenan ku Mi ta duna boso. Ami ta ku boso i Mi ta yama boso danki, pasobra boso ta biba tur loke Mi ta bisa boso. Mi ke invitá boso biba nan ku entusiasmo i legria renobá. Mi ta deseá ku boso bida di tur dia bira orashon. Danki pa boso tende mi yamada." 06/2003

Mensahe di dia 25 di yüli 2003 "Mi yunan stimá! Awe tambe Mi ta invitá boso pa resa for di boso kurason i eksperensiá legria di esaki. Si boso logra esaki, esta, resa for di kurason i sinti un legria profundo, kada un di boso lo deskubrí un pas ku ta brota for di boso kurason i boso alma lo ta na pas. Lo boso sinti e nesesidat di duna testimonio na otro di e amor ku ta reina den boso kurason i den boso bida. Ami ta huntu ku boso i Mi ta intersedé pa boso tur dilanti di Dios. Danki pa korespondé na mi yamada!" 07/2003

Mensahe di dia 25 di ougùstùs 2003 "Mi yunan stimá! Awe mi ke invitá boso pa gradisí Dios den boso kurason pa tur e fabornan i grasianan ku E ta duna boso, tambe pa medio di e señal- i kolónan di kreashon. Dios ke pa boso bai serka djE i E ta pidi boso pa dun' É gloria i alabansa. P' esei, mi yunan stimá, Mi ta renobá e invitashon ku Mi a hasi boso hopi biaha kaba: resa, resa, i sigui resa. No lubidá nunka ku Mi ta ku boso. Mi ta intersedé dilanti di Dios pa kada un di boso te ku boso legria den djE lo ta kompletu. Danki pa korespondé na mi yamada." 08/2003

Mensahe di dia 25 diseptèmber 2003 "Mi yunan stimá! Awe tambe Mi ta invitá boso hala boso serka mi kurason. Di e manera akí só boso por komprondé kiko ta nifiká mi presensia meimei di boso. Mi yunan stimá! Mi ta deseá di hiba boso tur na Kurason di mi Yu Hesus. Pero boso no ta paga tinu, boso ta resistí na mi invitashon i boso no ke habri boso kurason na orashon. Mi yunan stimá! Mi ta sigui yama boso. No sea surdu na mi yamada. Asina só boso por komprondé ku mi presensia ta motibu di salbashon pa boso tur! Danki pa korespondé na mi yamada!" 09/2003

Mensahe di dia 25 òktober 2003 "Mi yunan stimá! Mi kier invitá boso tur pa renobá boso konsagrashon na mi Kurason i na Kurason di Hesus, mi Yu dibino. Mi yunan stimá! Mi kier kompañá boso riba e kaminda di kombershon i santidat. Esaki ta e úniko kaminda, ku pa medio di boso, Ami ku mi Yu por hiba hopi hende na alkansá nan salbashon. No pèrdè tempu, mi yunan stimá, ma bisa for di profundo boso kurason: Mi ke yuda Hesus i Mama Maria pa hopi hende sera konosí ku e kaminda di santidat. Di e manera akí boso lo ta kontentu di ta amigu di Hesus. Danki pa korespondé na mi yamada!" 10/2003

Mensahe di dia 25 di novèmber 2003 "Mi yunan stimá! Mi ta invitá boso pa laga e tempu ku ta bai kuminsá (tempu di Atvènt) sea pa boso un estímulo pa boso biba boso bida di orashon ku mas forsa i entusiasmo. Mi yunan stimá, durante e tempu akí boso mester resa pa Hesus nase den tur kurason, spesialmente den kurason di esnan ku no konos´ É ainda. Boso sea ta amor, legria i pas den e mundu akí ku no tin pas. Ami ta ku boso i Mi ta intersedé pa kada un di boso dilanti di Dios. Danki pa korespondé na mi yamada!" 11/2003

Mensahe di dia 25 di dezèmber 2003 "Mi yunan stimá! Awe, tambe, Mi ta bendishoná boso huntu ku Hesus, mi Yu dibino, Kende ta den mi brasa. Ami ta trese Hesus, Rei di pas, pa E duna boso su pas. Ami ta ku boso, mi yunan stimá, i Mi ta stima boso tur. Danki pa korespondé na mi yamada!" 12/2003


APARISHON ANUAL NA JAKOV COLO

(For di aña 1998 La Bírgen Maria ta apares´ é riba tur dia di Pasku di Nasementu i ta laga un mensahe p´ e i pa tur).

Esaki ta e mensahe di e aña akí:

"Mi yunan stimá! Awe Hesus ke duna boso su pas na un manera spesial i Ami ta invitá boso resa pa e pas ku ta den boso kurason i Mi ta bisa boso: sigui resa pa pas di boso kurason. Mi yunan stimá, sin pas den boso kurason, boso no por sinti e amor i legria di Nasementu di Hesus. P´ esei, mi yunan stimá, Mi ta pidi boso, riba dia di awe: habri boso kurason i kuminsá resa. Pa medio di orashon so i pa medio di boso dunamentu generoso i kompleto, e amor i pas de Hesus lo yena boso kurason. Mi ta bendishoná boso ku mi bendishon di Mama."


BackHomeOverviewInfo
Last Modified 12/26/2003