Our Lady Of Medjugorje

Messages From 2000 In Papiamento

Mensahe di 25 di yanüari 2000 "Mi yunan stimá! Mi ta pidi boso, mi yunan, pa resa sin stòp. Si boso resa, boso ta mas serka di Dios i E lo guia boso riba e kaminda di pas i salbashon. Ta p'esei, mi ta pidi boso awe pa duna otronan pas. Ta den Dios so tin e pas berdadero. Habri boso kurason i bira esnan ku ta parti pas. E ora ei otronan lo deskubrí pas den boso i pa medio di boso. Di e manera aki boso lo duna testimonio di Dios su pas i amor, ku E ta duna boso. Danki pa a skucha mi yamada!" 01/00

Mensahe di 25 di febrüari 2000 "Mi yunan stimá, Spièrta for di e soño di inkredulidat i piká, pasobra e tempu aki ta un tempu di grasia ku Dios ta duna boso. Probechá di e tempu aki i pidi Dios e grasia di sanashon di boso kurason, pa boso por mira Dios i hende ku kurason. Resa na un manera speshal pa esnan ku no a yega na konosé amor di Dios, i duna testimonio ku boso bida pa nan tambe por bin konosé Dios i Su amor inmenso. Danki pa a skucha mi yamada!" 02/00

Mensahe di 25 di mart 2000 "Mi yunan stimá, Resa I probechá di e tempu aki, pasobra e tempu aki ta un tempu di grasia. Mi ta serka boso I ta intersedé pa kada un di boso dilanti di Dios, pa boso kurason habri pa Dios I pa Dios su amor. Mi yunan, resa sin stop te ora orashon bira un goso pa boso. Danki ku boso a skucha mi yamada." 03/00

Mensahe di 25 di aprel 2000 "Mi yunan stimá! Awe tambe mi ta pidi boso pa kombertí. Boso ta demasiado preokupá pa kosnan material i tiki pa kosnan spiritual. Habri boso kurason i bolbe kuminsá traha mas riba boso kombershon personal. Disidí tur dia di dediká tempu na Dios i na orashon te ora orashon bira pa boso un enkuentro gososo ku Dios. Ta di e manera aki so boso bida lo tin sentido i ku alegria boso lo kontemplá bida eterna. Danki pa a skucha mi yamada." 04/00

Mensahe di 25 di mei 2000 "Mi yunan stimá! Mi ta kontentu ku boso i den e tempu di grasia aki mi ta invitá boso na renobashon spiritual. Resa, mi yunan, pa Spiritu Santu por bin biba plenamente den boso, di manera ku boso, ku goso, por duna testimonio na tur esnan ku ta leu for di fe. Resa speshalmente, mi yunan, pa e donnan di Spiritu Santu; pa den espíritu di amor boso por ta, tur dia i den kada situashon, mas serka di boso próhimo i pa boso por vense tur difikultat ku sabiduria i amor. Mi ta huntu ku boso i ta intersedé pa kada un di boso dilanti di Hesus. Danki pa a skucha mi yamada!" 05/00

Mensahe di 25 di yüni 2000 "Mi yunan stimá! Awe mi ta pidi boso pa resa. Esun ku ta resa no tin miedu di futuro. Mi yunan, no lubidá: Mi ta huntu ku boso i mi ta stima boso tur. Danki pa a skucha mi yamada!" 06/00

Mensahe di 25 di yüli 2000 "Mi yunan stimá! No lubidá ku boso ta aki na mundu na kaminda pa eternidat i ku boso kas ta den shelu. P'esei, mi yunan, sea habrí pa amor di Dios i laga egoismo i piká. Mara boso legria por ta solamente e deskubrimentu di Dios den orashon di tur dia. P'esei, probechá di e tempu aki i resa, resa, resa i Dios ta serka di boso den orashon i pa medio di orashon. Danki pa a skucha mi yamada!" 08/00

Mensahe di 25 di ougùstùs 2000 "Mi yunan stimá! Mi ta deseá di kompartí mi legria ku boso. Den mi Inmakulada Kurason mi ta sinti ku tin hopi di esnan ku a yega mas serka di mi, na un manera speshal, ta karga viktoria di mi Inmakulada Kurason den nan kurason dor di resa i kombertí. Mi ke yama boso danki i ke inspirá boso pa traha ainda mas tantu pa Dios i Su reino, ku amor i forsa di Spiritu Santu. Mi ta huntu ku boso i ta bendishoná boso ku mi bendishon maternal. Danki pa a skucha mi yamada!" 08/00


BackHomeOverviewInfo
Last Modified 08/30/2000